Jednoć su bili pas, mačka, oslica i petijeh. Ovi su štiri šli skupa po svitu, su se jedan drugomu tužili. Pas reče da je star, da ga gostopar već ne triba.
– Ur ne poštuju, ne obljubu dielo, vidim da doma bude mi žitak teški.
Oslica je rekla da je tekej stara, da ju neće potribovat doma, a se tužila:
– Ja oš dom ljubim, držim za mejku – dom je moja mat – ali ča ću, hitili su me van. A će to bit pre nji prijepast. Hiša ka nima oslice grie va prijepast.
Mačka je rekla akurat tako:
– Gostopar deset dicijah daje mliko, ali ja sam od protulića do protulića bila žajna. Jimaju se ča je potribno žitku, mene hitiju od pieći, meni nimaju ništ.
Petijeh:
– Svitom će bit zlo – ja vam povim – kad petijeh ur ne triba doma. Bude on oš tribat!
Tako su se pobirali, su prošli po sviti, a skupa došli do jednija vodija. Seda nisu znali kako ćeju dojt prik vodija, ali oslica zajači:
– Ča sam tote ja, i-a?!
Mačka a petijeh skočili su na oslicu, a pas je sam preplu prik vodija. Kad su došli prik, je bila škura noć. Kamo ćeju seda spat?! Došli su do jednoga sela, a šli su va jedan stan. Mačka je rekla: ona spi doma na komini. Pas spi pod viežnimi vrati, petijeh na drivi.
Oslica je rekla:
– Štale nimam – budem spat na gomili.
Kad su viečer spali u dvanejstih ura došli su kmini.
Oni su poslali jednoga va hižu da potare vragu roge. Pas je trudan, a ga ne čuje. Mačka je spala na komini, oči su joj svitili kot žeravka. Kmin nima štrafelne, a misli da je to oganj, a je tiu načinjit svitlo, ali kad popane mački do očiju ona ga je ukrbasnula.
Seda se on prestraši, biži van, se popikne, na to se zbudi pas med viežnimi vrati – ta mu skine dno, rit. Petijeh se tekej zbudi, na stabli zakukurika. Na to se kmin oš prestraši, misli da mora najzad bižat zi hiže, biži prik gomile, prik plota. Tote ga dočekala oslica, je zajačila jačku a tak poritala da je kumaj i koža mu ostala. Ovaj kriči kot da je kuharici kikljača zgorila, a si kmini su bižali.
Kad su skupa došli ta – ki je biu va hiži – reče:
– Ja sam obivau velik dio svita ali taka nesrića nikat mi se ni godala.
– Ča se to godalo?!
– Ča?! Tote je škuro po hiži ali su gostopari skupa pri kukurica čihanju. Nima tote ništ za nas.
– Ča nima?! Jimaju petijeha, jimaju jej!
– Nimaju ništ. Ča moreju jimat ki su va škurini pri kukurica čihanju a nimaju ni svitlo?! Ja vam povim z jednom ričom: zi pakla sam se prebiju van ali tote ne griem najzad.
– Onda povi, ča se godalo da si tako prestrašen?!
– Ča?! Štrafelne nimamo, va hiži je oganj. Tiu sam načinjit svitlo. Popanem ognja, jedan me poriže, bižim van, jedan mi med viežnimi vrati dno skine, a jedan oš kriči:
– Ča ćeš, ku-ku-ri-ce-ee-e?! Ku-ku-ri-ca, tote će ti ujit!
A ja kričim:
– Gostopari, Bog vam vali na ovom dari! Ur mi ništ ne triba.
Zi hiže bižim van, ali na gomili me jedan zatiepe po dnu, a jači jačku:
– Da kukuricu ne zgubiš: simo rit – ja ti budem zabit!
Onda su jimali velik lonac, su se na njega popiknuli, a je povidajki konac.
Cvjetovi mećave, Zagreb, 1971.