Arhiv tekstova
Kako je zniknulo selo Dubravka
Kod oš dica smo bili, kad smo pri pjeći sidavali, su ti stari naši povidali pripomjenke kako su došli simo Horvati ča su se ovden sranili, kako je selo naše zniknulo.
Ovden je bila velika guora hrastova aj su došli – ale sad ne znam odakle – naši Horvati, pilari, aj su pilili aj su si neg takove bude djelali. Oni su ugibali pred tureckim natlakom, su bili utečenci. Najprv su se sranili va guštje. Oš se to mesto zovje Vazmene Dražice. To se ime netje zimrit nigda. Kad su ur čuda lijet bili pa je se to rozmnožilo su ostali. To selo je zigorilo pak su muorali naspet budovat.
Oni su najprv zikričili tu guoru, su si postavili drivene hiže, a takuonak su se usadlili. Slovenski se hrast veli dub, a pak je bila hrastova guora je selo naše dobilo ime Dubrava.
Ale Turac je naspet cjez našu krajinu huodil. Ja velim kod je to bilo. Bil je život jako bidan. Naši su naspet va guori nuoćivali, neg pečene erteplje brali. Turecki vojaci su se zjeli, lebo sedam lijet ništ ni urodilo, pak su naši oslici prilijezali na hrbat aj su simo muorali donijest se zi druge krajine. Jako su se natrapili, ale nisu imali straha, muži aj žene su djelali proti Turkom.
Tako jednuč va Dubravi žena ča je bila najvrlija spekla hlib, a Turac je prišal pjeći se grijat. On je imal sablju, a ona nože tegnula, je Turkom glavu otsikla. Kad su to vidili naši, tegnuli sablje pak je prokleti Turac prošal zi naše krajine. Ale dok je Turac bil od maljučka naši nisu ništ dobro skusili.
Pričala Rozalija Sedlak r. Debeli, Dubrava, r. 1873. g.
Cvjetovi mećave, 1971.
Manje poznate riječi:
zniknut – nastati, izniknuti
kod – dok
pripomjenka – pripovijetka
simo – ovamo
ča – što
sranit se – skriti se, skloniti se
aj – čak, i, ali
ale – ali
pilar – pilač
bude – poslovi, daščare
budovat – raditi
ugibat – uzmicati, sklanjati se
natlaka – tlaka
utečenci – izbjeglice
guštje – grmlje, šipražje, gusta, neprohodna šuma
zimrit – umrijeti, nestati
ur – već
čuda – mnogo
lijet – godina
zigorit – izgorjeti
naspet – opet, ponovo
hiža – kuća
takuonak – zatim
usadit se – naseliti se
slovenski – slovački
cjez – kroz
krajina – kraj, područje, država
huodit – prolaziti, ići
erteplje – krumpiri
brat – prikupljati, sakupljati
zjet se – najesti se
lebo – jer
oslici – magarci
zi – iz
natrapit – natrpjeti
muži – ljudi
skusiti – osjetiti, iskusiti, doživjeti
